LAOAG CITY – Maproblemaan ti sumagmamano a mannalon aglalo dagiti agmulmula ti tabako iti Ilocos Norte gapu iti bigla a panagbaba ti presyo ti nasao a produkto ditoy probinsia.
Daytoy ti inpakaammo ni Hon. Ryan John Pascua, Presidente ti Liga ng mga Barangay ti Ilocos Norte kabayatan ti binolan a pannakitaripnong ni Gob. Cecilia Araneta Marcos kadagiti kameng ti Sang. Panlalawigan nga idadauloan ni Bise Gob. Matthew Marcos Manotoc ken dagiti department heads ti gobierno probinsyal.
Inbatad na nga adda ti panagamak na amangan no daytoy ti mangitunda iti panagsardeng dagiti dadduma a mannalon nga agmula ti tabako iti sumaruno a tawen 2027 a mangapektar iti bingay ti Ilocos Norte iti excise tax ti tabako.
Inlawlawagna nga adu payen dagiti makapanunut a mapan aglako idiay Ilocos Sur ken La Union gapu ta nanginngina ti presyo ti produkto kadagiti nadakamat a lugar.
Mainaig iti daytoy, inlungalong ni Senior Sang. Panlalawigan Member Rafael Chua Medina iti panangtulong ti gobierno probinsyal kadagiti maseknan a mannalon babaen iti panangawis kadagiti aggatgatang ti tabako kadagiti nadakamat a probinsia tapno dagitoy ti umay aggatang ti Ilocos Norte.
Kunana nga iti agdama ket saan metten a problema ti pannakailako ti tabako iti sabali a probinsia agsipud ta maibasar metten ti bingay dagiti lokal a gobierno iti Republic Act 7171 iti kalawa ti daga a namulaan.
Kabayatanna, inlawlawag ni Engr. Maria Teresa Bacnat iti Provincial Agriculture Office a ti panagbaba ti presyo ket gapu iti panagado ti supply ti bulong ti tabako ditoy probinsia.
