LAOAG CITY – Saan a napalubusan a makastrek dagiti sumagmamano a a napan nagbuya iti umuna nga aldaw ti 2024 Paris Olympics gapu ta awan ti maipakitada a QR Code.
Basar iti pannaki-uman ti Bombo Radyo Laoag ken ni Bombo International News Correspondent Rye Cristobal manipud idiay Paris, France, daytoy ti pakakitaan a seryoso dagiti otoridad ken organizers iti panangipatungpal kadagiti naiyatnag a pagalagadan.
Inpettengna a saanda a pulos nga akseptaren ken pastreken dagiti awan ti QR Code-na gapu ta nairakurak daytoyen sumagmamano a lawas sakbay pay a pormal a nangrugi ti Paris Olympics.
Mainaig iti daytoy, inpakaammo ni Cristobal nga adda ti nasurok 45 a ribu a kapulisan ti naiwaras kagiddan ti panangrugi ti Paris Olympics no sadino nga adda pay ti sumurok dua a ribu a security officers ti nainayun nga agserbi a mangkita ken agbantay iti linak, urnos ken talna iti aglawlaw kadagiti sporting venues.
Inlawlawagna a nakitana dagiti atleta a pambato ti Pilipinas a nakaragragsak ken magagaran a makibinnalubal kadagiti kalabanda iti nagduduma a tay-ak ti ay-ayam.
Kunana nga alas dos pay laeng ti malem ket dupudupen dagiti tattao rason nga alisto a napno ti Seine River a pakabuyaan ti panagparada dagiti makipaset iti Paris Olympics a nakaluganda ti bangka.
Innayonna a saan a nagbalin a lapped ti napasaranda a panagtudo iti baet a nabasada ket saanda a nagtalaw ken pinalabes a mabuya ti naisangsangayan nga aktibidad.
