LAOAG CITY – Kinasapulanen nga ipasardeng ti operasion dagiti merkado idiay Taiwan gapu iti pangta ti Bagyo Gaemi a Bagyo Carina ditoy Pilipinas.
Naipasardeng ti serrek dagiti mangmangged ken dagiti empleado kagiddan ti napigsa a tudo ken angin iti lugar.
Maipalagip nga immunan a kinanselar ti nasao a pagilian ti tinawen nga Han Kuang war games tapno masagaanda iti iduduprak ti nasao a bagyo.
Iti Capital a Taipei ken dagiti kaparanget a siudad a New Teipei, Keelung ken Tauyuan ket nagrikep metten dagiti pagadalan ken financial market gapu iti pangta ti nasao a bagyo.
Kagiddan iti daytoy, naka-standby metten ti sumurok maysa a ribu a rubber boats para iti posible a panaglayus iti dakkel a paset ti Taiwan gapu iti napigsa a tudo.
Nagisagana metten ti nasao nga estado dagiti ’emergency’ food, danum ken dagiti communication equipment.
Inbatad ti Taiwan Defense Ministry Spokesperson Sun Li-fang, sigurado a marikna ti epekto ti nasao a bagyo isu a nagsaganada metten iti air ken naval assets para iti aniaman a posible a mapasamak.
Kabayatanna, manamnama a dumuprak ti Bagyo Gaemi ti Taiwan kagiddan ti panagruar daytoy iti teritorio ti Pilipinas.
