LAOAG CITY – Tinalantan dagiti sumagmamano a Senador ti nagbalin a panaglabsing ti Philippine National Police-Criminal Investigation and Detection Group (PNP-CIDG) iti inaramid a panangarestar ken ni dati a Presidente Rodrigo Duterte.
Iti nagbalin a panagdengngeg ti Senado maipapan iti nagbalin a proseso ti panangarestar ti Interpol ken International Criminal Court (ICC) ken ni dati a Presidente Duterte, dinakamat ni Senate Committee on Foreign Relations Chairman Imee Marcos ti panaglabsing ti Philippine National Police-Criminal Investigation and Detection Group iti standard operating procedures-da no adda ti arestarenda no sadinno a maipawil ti agusar ti puersa, kinaranggas, panagpangta, intimidation wenno dadduma pay a wagas a makalapped iti free will ti maysa a maar-arestar nga indibidual.
Daytoy ket kalpasan nga inadmitir ni Philippine National Police-Criminal Investigation and Detection Group Director P/MGen. Nicolas Torre III a nagusar isuna ti puersa kontra kadagiti legal counsel ti dati a Presidente nga isuda Atty. Salvador Medialdea ken Atty. Martin Delgra III gapu iti “obstruction of justice.”
Malaksid iti daytoy, binabalaw met ni Senate President pro-tempore Jinggoy Estrada ti saan a panangipalubos ni Torre a sumrek ni Vice President Sara Duterte iti uneg ti Villamor Airbase.
Inpetteng ni Estrada, ipalpalubos ti linteg dagiti immediate family members a bumisita iti akusado iti uneg ti 24 nga oras ken nasken nga inikkan ti kortesiya ti Bise Presidente nangruna ket saan met pay a nakabalud ni dati a Presidente Duterte.
Naammoan a ti kangrunaan a dinakamat ni Sen. Imee Marcos ti posible a panaglabsing iti Republic Act No. 7438 no sadinno a maipabulos ti access ti maysa nga akusado iti pamiliana, dagiti abugado, medical doctor, padi wenno religious minister, non-governmental organizations (NGOs), CHR ken international NGOs nga accredited ti Office of the President.
