LAOAG CITY – Nangiwayat ti inspeksion ti City Disaster Risk Reduction and Management Office iti siudad ti Batac kadagiti establishimento ken pasdek negosio kalpasan iti idadayyeg ti 5.8 magnitude a ginggined.
Segun ken ni Mr. Arvin Lumang, mangidadaulo iti nasao a pangopisinaan, nagturong ti grupoda kadagiti nagduduma a barangay tapno ammoen ti agdama a situasion dagitoy.
Inbatadna a kabayatan a maisursurat daytoy a damag ket awan dagiti nairekord a nadadael a pagtaengan wenno pasdek gapu iti napigsa a ginggined.
Kunana a naballaagan met dagiti umili iti siudad ti Batac nga agbalin a naridam no bilang adda dagiti afterschocks a mapasamak.
Kabayatanna, adda dagiti natnag ken nagkaiwara a produkto iti maysa a dakkel a grocery store ditoy siudad ti Laoag gapu iti idadayyeg ti 5.8 magnitude a ginggined.
Iti agdama, manarimaan pay laeng ti panangmonitor ti Provincial Disaster Risk Reduction and Management Office kadagiti nagduduma nga ili ken siudad ditoy probinsia.
Immuna iti daytoy, naruay nga umili ti nagdanag kalpasan a narikna ti 5.8 magnitude a ginggined a nagsentro iti ili ti Bangui.
