LAOAG CITY – Aggudua ti opinyon dagiti sumagmamano a Senador no ituloy wenno saan ti impeachment trial ni Vice President Sara Duterte kalpasan ti inparuk-at a desision ti Korte Suprema a mangidekdeklarar a ti Articles of impeachment ket unconstitutional.
Nagballaag ni Senador Juan Miguel Zubiri a mabalin a ma-contempt ti Senado no bilang ituloy ti impeachment trial ken posible a maaddaan ti constitutional crisis malaksid pay iti dangerous precedent no naglabsingda iti ruling ti Korte Suprema.
Inpetteng ni Zubiri a respetaren laengen ti nagbalin a desision ti Korte Suprema.
Mangnamnama ni Sen. Risa Hontiveros nga adda pay ti namnama gapu ta adda ti nadamagna nga adda ti mangipila ti motion for reconsideration.
Mainaig iti daytoy, kuna ni Sen. Erwin Tulfo, iti baet nga iresrespetarna ti desision ti Korte Suprema ket maipapaayan met ti bileg ti konstitusion ti Senado a padasen ken desisionan ti amin nga impeachment cases.
Naammoan nga inton Lunes ket mapagsasaritaan iti Senado no suroten o wenno saan ti pammilin ti Korte Suprema.
Immunan a nagpanawagan ni Sen. Bam Aquino kadagiti padana a Senador a nasken nga ituloy ti impeachment trial ken insigida a mangisayangkat ti caucus tapno mapagnunumoan ti nasao nga isyu.
