LAOAG CITY – Sumagmamano a senador ti nagatendar iti maikadwa a panagkasar da Vice Governor Matthew Marcos Manotoc ken ni Miss Earth 2014 Jamie Herrell a naangay iti La Virgen Milagrosa Chapel iti ili ti Badoc.
Karaman ditoy da Senador Camille Villar, Robin Padilla, Loren Legarda, JV Ejercito ken adda pay ni dati a Senador Cynthia Villar.
Malaksid kadagitoy ket nagatendar pay dagiti local officials, department heads ken dadduma pay nga agpapaay iti gobierno ditoy probinsya.
Mainaig iti daytoy, indanun ni Senador Ejercito ti nabara a pangablaaw na iti panagkallaysa da Manotoc ken Herrell no sadinno a kunana a nabayagen nga agpagayam da iti bise gobernador, malaksid pay ti panagbalin da kas golf partners.
Maipalagip nga immuna a nagkasar da Vice Governor Manotoc ken Herrell iti Cebu Cathedral idiay Cebu idi Enero 9 ita a tawen.
