LAOAG CITY – Sumagmamano kadagiti agad-adal iti Mariano Marcos State University (MMSU) – Elementary Campus ti saan a nakastrek sipud pay itay napan a lawas gapu ta aggugurigor ken agguuyek da.
Patien ni Doctor Jobenita Aragon, Principal iti nasao a pagadalan a ti panagbaliw-baliw ti paniempo ti makaigapu ti panagsasakit dagiti agad-adal iti MMSU-Elementary Campus.
Segun ken ni Aragon, kaadoan kadagiti agad-adal a nagsakit ket manipod iti Grade 1 class ken adda pay ti maysa a Grade 3 pupil ti nagpositibo ti sakit a dengue.
Gapu iti daytoy, inbatad ni Aragon a dagus da a nagdalos ken nag-disinfect kadagiti kwarto iti nasao a pagadalan babaen ti tulong dagiti nagannak.
Innayon na a plano da pay ti ag-disinfect iti sibubukel a pagadalan ngem masapol nga isayangkat da daytoy no awan ti klase.
Mangnamnama ni Aragon nga agimbag aminen dagiti adalan da kangrunaanna ket periodical test da.
Inpasigurado ti principal a dagiti nagsakit nga adalan da ket maikkan ti konsiderasyon para iti idadalan da nga special test.
