LAOAG CITY – Kinumpirmaran ni Mrs. Julie Anne Quiroga, market supt. iti Laoag City Commercial Complex ditoy ciudad ti Laoag nga adda iti 10 nga aglaklako iti tiendaan a nagreklamo iti opisinana.
Daytoy ket mainaig ti panangsingsingir kadakuada idi ni Miss Darlene Deuz, revenue collector nga awan ti it-ited na nga opisyal a resibo no di ket isursurat na laeng iti papel nga adda ti perma ti maseknan.
Inlawlawag na a kaadoan kadagiti nagreklamo nga aglaklako ket binolan a nagbaybayad idinto a dagiti dadduma ket linawas.
Gapu ti daytoy, kuna ni Quiroga a kayat dagiti maseknan a malawlawagan ti rekord da ken ti rekord iti opisina da.
Naamoan a basar iti listaan dagiti maseknan nga aglaklako, umaboten ti 100 a ribo a pisos ti naibayad ti tunggal maysa kadakuada.
Ni Deuz ket kabsat ni dati a market supt. Shiela Rapatan de Leon.
Kabayatanna, saan pay a naala ti sungbat ni Deuz gapu ta nakabakasyon daytoy ken agsubli pay laeng iti trabaho na intono Lunes, Hulyo 29.
