LAOAG CITY – Inrakurak ni Civil Military Operations Officer of the 501st Infantry “Valiant” Brigade Major Bryan Albano nga adda dagiti sumagmamano a makakannigid a grupo ti mang-recruit kadagiti agtutubo tapno makikappeng kadagiti armado a grupo.
Gapu iti daytoy, kunana a nangiyuswatda ti Regional Peace and Order Council nga indauloan ni La Union Gov. Raffy David-Ortega pakairaman dagiti gobernador iti rehion uno.
Inbatadna a babaen iti daytoy ket nairubuat ti Information Education Campaign para kadagiti agtutubo tapno maiyadayo dagitoy iti pannakikappeng kadagiti makakannigid a grupo.
Kunana a dagiti ma-recruit dagiti makakannigid a grupo nga agtutubo ket ibaonda dagitoy a mangiwayat ti riribok ken mangirugi ti terorismo iti lugar.
Inlawlawagna a daytoy nga addang ket programa ti gobierno tapno maisardeng ken malappedan dagiti dakes a panggep dagiti makakannigid a grupo.
Mainaig iti daytoy, dakkel a tulong ti pannakaiwaras ti umiso nga impormasion kadagiti pagadalan tapno maimpormaran dagiti estudiante nangruna iti pannakipartisparda iti Reserve Officers’ Training Corps.
Kabayatanna, kalikagumda a likosen amin a pagadalan iti intero a rehion uno tapno maipasagepsep kadakuada ti rumbeng nga aramidenda tapno maliklikan ti pannaka-recruit dagitoy kadagiti makakannigid a grupo.
Immuna iti daytoy, addan dagiti sumagmamano nga agtutubo ti nagutigot dagiti armado a grupo rason a naiget ti panangitandudoda iti kampania para iti proteksion dagiti estudiante kontra iti terorismo.
