LAOAG CITY – Inreport ni Bombo International News Correspondent Jim Christzer Pablo iti Japan a sipud pay idi Hunyo ita a tawen ket makapaspasar dan ti nakaro a kinabara ti temperatura.
Inbatad na nga iti agdama ket summer season iti Japan isut gapuna a namnamaen da nga agingga paylaeng iti bolan ti Agosto ti mapaspasaran da a nakaro a kinabara ti panawen iti nasao a pagilyan.
Inyarig pay ni Pablo a ti mapaspasaran da a nakaro a kinabara ti panawen iti Japan ket arigna adda da iti dakkel nga oven no adda da iti ruwar ti pagtaengan da.
Gapu iti daytoy, kuna ni Pablo a no rumuar da iti pagtaengan ket adda amin ti bitbit da a bassit nga electric fan wenno aniaman a mabalin da a pagpaypay tapno maalay-ayan ti mapaspasaran da a nakaro a kinabara ti panawen iti Japan.
Inpakaammo na pay a gapu iti mapaspasaran a nakaro a kinabara ti panawen iti Japan ket adda da metten dagiti sumagmamano nga indibidual a nagpasar iti heatstroke.
Iti sabali a bangir, inbatad ni Pablo nga agtultuloy met ti panagballaag ti gobierno iti Japan iti publiko a masapol nga itultuloy da nga obserbaren ti health protocols tapno maliklikan ti covid-19 virus ken ti monkeypox.
Naamoan nga iti agdama ket addan ti dua a kaso ti monkeypox a nairekord iti Japan.
