LAOAG CITY – Interesado dagiti “investors” nga immay bimmisita ditoy probinsia iti kallabes nga agnegosio ditoy Ilocos Norte nga adda pakainaigan ti “renewable energy”, agrikultura ken ti mangipasdek ti resort.
Daytoy ti inbatad ni Bise Gob. Cecilia Araneta Marcos.
Maipalagip a mismo a ni Bise Gobernador Marcos ti nangipasiar kadagiti nadakamat a negosiante.
Inlawlawagna nga iti panagturongda idiay Cebu itay kallabes para iti pannakaitandudu ti “direct flight” a Laoag-Cebu ken Cebu-Laoag ti Philippine Airlines ket ginundawayanna ti nangawis kadagiti “investors” nga umay ditoy probinsia.
Imbatadna nga impannakkelna kadagitoy nga adu dagiti oportunidad a mabalin nga idiaya ti Ilocos Norte.
Kunana a daytoy met ti nakaragsakanna agsipud ta adu a taga Cebu, Mindanao ken Manila dagiti naallukuyna nga immay bimmisita.
Segun kenkuana, dua kadagitoy ti agtultuloy ti pannakisarsaritada kenkuana nangnangruna kadagiti interesado a mangipasdek ti renewable energy ken resort.
Inbunannag ti bise gobernador nga iti kanito a matuloy ti plano dagiti nadakamat nga “investors” ket adu manen a trabaho ti maidiaya kadagiti umili.
Malaksid iti daytoy, inpakaammona nga adda pay ti maysa a grupo dagiti investors nga interesado iti agrikultura kangrunaanna iti industria ti dragon fruit ken sabali pay ti grupo dagiti taga Zamboanga a kalikagumda ti sumrek iti “fishing industry”.
Kabayatanna, impalgakna nga adda ti duan nga investor a nangiparipirip nga interesado a mangbiag iti Northern Foods Corporation.
Nupay kasta, inlawlawagna a masapul a masulbar nga umuna dagiti problema a sangsangwen ti nasao a korporasyon sakbay a maituloy ti negosasyon.
