LAOAG CITY – Umawat ti livelihood starter kits dagiti iskolar ti Technical Education and Skills Development Authority (TESDA) ditoy Ilocos Norte nga agturpos iti panagsanay iti produksion ti tinapay ken pastry.
Segun ken ni Mrs. Socorro Galanto, Provincial Director ti nasao a pangopisinaan, a saan a kumurang iti 15 ti addaan ti National Certificate 2 on bread ken pastry production a dimmalan iti 10 agingga iti 20 nga aldaw a panagsanay ti makaawat kadagiti starter kits.
Malaksid iti daytoy, kunana a makaawat dagiti 15 a benepisiario inton bigat iti maysa nga oven ken maysa nga electric mixer a mabalinda nga usaren kalpasan ti panagsanayda iti Technical Education and Skills Development Authority -accredited Ilocos Norte College of Arts and Trades.
Inbatadna a namnamaenda pay ti pannakaited dagiti toolkits a buklen dagiti assembly night lights ken post lamp para iti 40 a benepisiario a nagsanay iti solar installation ken 60 a benepisiario para iti organic agriculture iti Banna Provincial Training Center.
Mainaig iti daytoy, inpakaammona nga adda ti 5,644 nga iskolar ti nakaturpos iti nagdumaduma a panagsanay idinto a manamnama a makaturpos dagiti nabati a trainees sakbay ti ngudo ti Hulio ita a tawen.
Kabayatanna, sumagmamano kadagiti basic course nga ipapaay ti Technical Education and Skills Development Authority a mangipapaay iti National Certificate (NC) ket mairaman ti automotive servicing NCI, cookery NCII, dressmaking NCII ken electrical installation and maintenance NCII.
