LAOAG CITY – Adda ti pakabuklan a 102,406 nga indibidual wenno katukad ti 30,522 a pamilia ti nairekord a naapektaran ti panagalburoto ti Bulkan Mayon basar iti kaudian a datos ti Office of Civil Defense (OCD) Region 5.
Ti nasao a bilang ket manipud iti 87 a barangay kadagiti naapektaran a lugar iti Region 5 partikular idiay Albay.
Kabayatanna, adda ti sumurok 1,000 a pamilia wenno sumurok 5,000 nga indibidual ti agdama nga adda iti uneg kadagiti evacuations centers.
Adda ti 26 a pamilia wenno 85 nga indibidual ti as-asistaran iti ruar kadagiti evacuations.
Inpasigurado ti Office of Civil Defense Region 5 nga agtultuloy ti inwayatda a koordinasion, monitoring ken panagresponde kadagiti naapektaran a lugar.
Basar iti Office of Civil Defense, nag-deploy-da kadagiti water trucks, water filtration systems ken nangipaay ti N95 masks kadagiti naapektaran nga indibidual.
Agtultuloy ti maiwaywayat a clearing operations kadagiti kalsada kadagiti naapektaran a lugar.
