LAOAG CITY – Natay ti sumurok 22 a tattao kalpasan ti napigsa a ginggined iti makindaya a paset ti Colombia.
Kaadoan a natay ket idiay Pereira, no sadinno a kuna ti mayor ti 18 a natay.
Tallo met nga indibidual ti natay iti paset ti Manizales, idinto a maysa ti natay idiay Buenaventura kalpasan a narba ti maysa a pasdek.
Idiay Cali, nasurok a dua a dosena nga istruktura ti narba ken adda dagiti na-trap iti uneg.
Kinuna ti mayor a di kumurang a dua a tattao ti naisalbar, pakairamanan ti maysa a baket ken maysa nga agtutubo a balasitang, kabayatan nga agtultuloy ti rescue operations iti dadduma a lugar.
Segun iti Colombian Geological Service, agarup magnitude 7.4 a ginggined iti agarup alas 7:34 ti bigat, iti lokal nga oras, iti kauneg a 96 a kilometro.
Narikna ti ginggined iti amin a 32 a department capitals ti Colombia.
Kabayatanna, temporario met a nasuspenso ti operasion kadagiti sumagmamano nga eropuerto idiay Pereira, Manizales, Quibdo, Armenia, Cartago ken Buenaventura kabayatan ti panangtingiting dagiti pasdek para iti possible nga structural damage.
Nagpakdaar met dagiti otoridad ti posible nga aftershocks.
