LAOAG CITY – Inpakaammo ni Mrs. Susan Gagarin, mangidadaulo ti Land Transportation Office nga adda ti sumurok 30 a plaka dagiti lugan ditoy siudad ti Laoag ti nakasaganan nga ibunong ti Land Transportation Office.
Segun kenkuana, iti agdama ket addan ti sumurok tallo a ribu a plaka dagiti lugan ti naibunongen.
Inbatadna a nakikoordinarda iti Philippine National Police ken Local Government Unit pakairamanan kadagiti Barangay para iti al-alisto a pannakaibunong dagiti plaka dagiti lugan.
Inlawlawagna nga adda ti pammilin kadakuada manipud iti higher office a masapul a maibunong dagiti amin a plaka dagiti lugan agingga inton bulan ti Oktubre.
Mainaig iti daytoy, kuna ni Gagarin a mabalin a masukatan ti plaka dagiti lugan a model iti tawen 2014 agingga iti 2017 pakairamanan dagiti addaan ti 7 characters.
Malaksid iti daytoy, kunana a basar iti kaiparparuk-at a pammilin ita nga aldaw iti opisinada ket masukatan payen ti plaka dagiti lugan a model iti tawen 2013 ken agpapaba.
Inpettengna a babaen iti daytoy ket agpapada amin ti klase dagiti plaka dagiti lugan.
Innayonna nga ipakita laeng ti ORCR ti lugan dagitoy ken awan ti bayadanda.
