LAOAG CITY – Namnamaen ti La Union Peace and Justice Advocates a mangngegan iti maikalima nga State of the Nation Address wenno SONA ni Presidente Ferdinand Marcos Jr. ti sungbat iti nagbalin a rakurakna a “Mahiya naman kayo” iti napalabas a tawen.
Segun ken ni Mr. Niño Oconer, Secretary-General ti nasao nga organisasion, nagtultuloy ti korapsion ken panagtatakaw iti gobierno no sadinno a sumagmamano laeng dagiti naibalud a pakairamanan dagiti kontra iti administrasion.
Inbatadna a saan nga umdas ti nagbalin nga imbestigasion ti Independent Commission for Infrastructure gapu ta mamati daytoy a saan laeng a ti agasawa a contractor a Discaya ken ti sumagmamano nga opisial ti Department of Public Works and Highways ti adda iti likudan ti anomalya a flood control projects.
Inlawlawagna a nasken nga ipakita ni Presidente Marcos ti tignay a saan ketdi nga agpatingga laeng ti sarita tapno saan a mapaay ken mapukaw ti talek dagiti naruay nga umili kenkuana.
Kunana a masapul nga agipasa ti gakat ti kongreso a mangikeddeng ti agpapada a sueldo dagiti mangmangged iti nagduduma a rehion iti pagilian.
Mainaig iti daytoy, inpetteng ni Oconer a saan a makatulong ken dakkel ti agbalin nga epektona kadagiti tattao ken komunidad ti Pax Silica project.
Kabayatanna, inikkan ni Oconer ti bagsak a grado ni Presidente Marcos.
