LAOAG CITY – Bassiten ti suplay ti anti-rabies vaccine para kadagiti umili ditoy siudad ti Laoag.
Segun ken ni Dr. Joseph Adaya, ti mangidadaulo iti City Health Office nga adda laengen 1,500 a doses no sadino tallo a dose ti maibakuna kadagiti maseknan nga indibidual a nakagat ti aso wenno pusa.
Inbatadna a saan nga umdas ti suplay ti bakuna kontra iti rabies gapu ta adda laeng ti tallo a milyon a pisos ti nailatang a pundo a katukad ti 1,500 a doses.
Inlawlawagna a ti umuna a dose ket ipapaayda a libre ngem ti maikadua ken maikatlo a dose ket bayadanen dagiti pasiente.
Kunana nga addan ti maysa a ribu ti nairekord a nakagat ti ayup ditoy siudad ti Laoag sipod idi Enero ita a tawen idinto nga iti napalabas a tawen nga adda ti nasurok a dua a ribu ti naimaldit a kaso.
