LAOAG CITY – Nagkari ti Japan a mangilatang ti $10 billion wenno katukad ti P600-bilyon a pisos tapno matulungan dagiti pagilian nga Asyano, partikular iti South East Asia, a makaala ti enerhiya karaman ti crude oil iti baet ti krisis nga epekto ti gubat iti Iran.
Inrakurak ni Prime Minister Sanae Takaichi ti baro a cooperation framework kalpasan ti online meeting kadwa na ti dadduma pay nga Asian leaders.
Dinakamat ni Takaichi a mangnamnama ti Japan iti South East Asia para iti petroleum-derived products, aglalo iti medical equipment, ken inpetteng na a nasinged ti Japan kadagiti pagilian nga Asyano iti babaen ti supply chains.
Gagem ti cooperation framework a matulungan dagiti pagilian iti Asya a makaala ti crude oil ken petroleum products, mapagtalinaed ti supply chains, ken palawaen ti stockpiles.
Basar iti Japan’s foreign ministry, ti $10-B financial aid ket katukad ti agarop maysa a tawen a crude oil imports kadagiti pagilian a karaman iti Association of Southeast Asian Nations (ASEAN).
Ti inisyatiba ket inawat dagiti lider manipod iti Pilipinas, Malaysia, Singapore, Thailand, Vietnam, Bangladesh, ken South Korea, ken pondoan dagiti institusyon kas ti Japan Bank for International Cooperation, Nippon Export and Investment Insurance, Japan International Cooperation Agency, ken Asian Development Bank.
