LAOAG CITY – Inpakaammo ni Presiding Officer/Vice Mayor Rey Carlos Fariñas nga adda ti naawat na a mensahe a mangibagbaga nga awanen ti supply ti Anti-Rabies Vaccine iti City Health Office ditoy ciudad ti Laoag.
Inbatad na nga indanun na met a dagus daytoy ken ni Dr Rodrigo Catcatan, ti mangidadaulo iti City Health Office.
Segun iti bise mayor, kinumpirmaran kenkuana ni Dr. Catcatan a pudno nga awanen ti supply ti Anti-Rabies Vaccine iti opisina gapu ta alisto a naibus.
Mainaig iti daytoy, inpanamnama ni Doctor Catcatan a gumatang da iti namnamaen da a makaanay a supply iti nasao a bakuna.
Kabayatanna, inpakaammo ti bise mayor nga indanun na metten daytoy a banag ken ni Mayor James Bryan Alcid.
Maipalagip nga immunan nga inbatad ni Dr. Catcatan a ti kaado dagiti makagkagat ken makarkaramutan ti aso ken pusa ket alisto a maibus dagiti gatgatangen da nga anti-rabies vaccine.
