LAOAG CITY – Nangisayangkat ti tignay-protesta dagiti ginasut a supporters ni Mayor Jessie Galano idiay Paoay, Ilocos Norte.
Bitbit dagiti tattao ti sumagmamano a placards nga adda nakasurat a “We Love You Mayor Jessie Galano”,” Pahalagahan ang boto namin” ken dadduma pay.
Malaksid ken ni Galano, sumagmamano kadagiti nakipagpaset iti tignay-protest dagiti opisyal ti barangay, karaman pay ti Vice Mayor ken Acting-mayor iti nasao nga ili.
Iti panagbitla ni Galano, inpasigurado na a masolbar ti sangsangwen da a pannubok babaen ti agtultuloy a panagkararag da, ken inkari na nga itultuloy na ti agserbi iti nadakamat nga ili.
Immuna ti daytoy, kalpasan ti uppat nga aldaw a pinagtugaw ni Galano ket adda ti maysa a memorandum a napan inserbi ti Department of Interior and Local Government (DILG) Regional Office.
Segun ken ni Atty. Lawrence Patrick Ostillore, ti nasao a memorandum ket aggapo a mismo ken ni DILG Sec. Eduardo Año ken inpetteng na a saan a mabalin nga agtugaw iti aniaman a posisyon ni Galano gapu iti kaso nga inpila iti Ombudsman ni dati a Mayor Dolores Clemente iti nasao nga ili.
