LAOAG CITY – Inpakaammo ni Mayor Michael Marcos Keon nga adda dagiti supporters-na a maipagarup a mahar-harass babaen kadagiti sumagmamano a Kapitan ditoy siudad ti Laoag.
Segun kenkuana, kabayatan ti panagkampaniana kadagiti nagduduma a barangay ditoy siudad ket adda dagiti supporters-na ti umasideg kenkuana nga agsangsangit a mangibagbaga nga adda ti sumagmamano a Kapitan ti mangbalballaag kadakuada nga agtalinaed iti uneg ti pagtaenganda ken saanda a kasarita isuna.
Inbatadna a saan a napintas ti ar-aramidenda kadagiti residente kabayatan ti panagkampania.
Inlawlawagna nga adda ti inpatulodda a surat kadagiti amin a barangay iti intero a siudad ti Laoag a mangipalubos iti panagkampaniada.
Immuna iti daytoy, adda ti napasamak a panagbinnara iti nagbaetan ni Mayor Keon ken ni Barangay Chairman Melecio Piñera iti Barangay 32-B, Lapaz ditoy siudad ti Laoag kabayatan ti panagkampania ti Mayor ken ti grupona iti nasao a barangay.
