LAOAG CITY – Kinumpirmaran ni Mr. Joseph Agullana a pinaputed na ti linya ti kuryente iti pinatakder a pagmeryendaan iti paset ti Barangay Sta. Maria ditoy ciudad ti Laoag.
Daytoy ket gapo iti sakti ti nakem na iti maipagarop a panangallilaw ni Atty. Emilio Edgar Doloroso Jr. kenkuana.
Segun kenni Agullana, nagsurat iti INEC ngem saan a pinalubusan wenno pinastrek ni Doloroso dagiti kameng ti INEC a putden ti linya ti kuryente ken saan na nga ammo ti rason.
Masdaaw ni Agullana gapo ta kalpasan a nagturong dagiti kameng ti INEC iti lugar iti aldaw ti Huwebes ket maipagarop nga inbatad ni Doloroso a mapan iti opisina iti Lunes ket adda met ti Biyernes a mabalin kuma a panagturong na iti INEC.
Gapo iti daytoy, mapaneknekan ni Agullana a nagaramid ni Deloroso ti istorya nga isu ti indatag na iti INEC gapo ta adda ti kopya na iti surat.
Kunana a nakailanad a ginatang ni Doloroso ti pasdek negosyo iti balor a 100 a ribo a pisos.
Naamoan nga immunan a naputed ti linya ti danom kalpasan a nagsurat iti INWD gapo ta sinukatan na ti dati a water tank a saan na nga inpakada.
Inbatad ni Agullana nga idi nasukatan na ti water tank ket pinuted na met ti serbisyo ti danom iti uneg ti balay a pagnanaedan ti katugangan na.
Ibilang ni Atty. Emilio Edgar Doloroso Jr. nga iligal ti addang a panagpaputed ti koneksyon ti kuryente no ti rason ket panagpatalaw iti maysa a maseknan.
Kunana a malabsing ti paglintegan Article 165 iti Civil Code of the Philippines ti addang ni Mr. Joseph Agullana.
Segun kenni Doloroso, masapol a dumalan iti due process ti nasao nga addang isut gapo na a pinapanaw na dagiti taga-INEC a mapan mangputed kuma ti koneksyon ti kuryente.
Inbatad a saan a nalaka a maputulan ti kuryente gapo ta adda ti agop-operar a negosyo ken agbaybayad daytoy.
Nupay kasta, inadmitir ni Doloroso a nainagan kenni Agulyana ti linya ti kuryente.
