LAOAG CITY – Mapilaan ti agsusukot a kaso ti suspek iti naiwayat nga Anti-Illegal Drug Buy-bust Operation iti Sitio Surong B, Barangay Upon iti ili ti Pinili.
Segun ken ni P/Maj. Sheryl Guzman, pannakangiwat ti Ilocos Norte Police Provincial Office, sumango ti suspek a ni Michael Umadac, agtawen ti 39, addaan ti live-in partner ken residente iti nasao met laeng a barangay iti kaso gapu iti panaglabsingna iti Republic Act No. 9165 wenno ti Comprehensive Dangerous Drugs Act of 2002, Republic Act No. 10591 wenno ti Comprehensive Firearms and Ammunition Regulation Act, COMELEC Gun Ban ken Frustrated Homicide.
Inbatadna a natiliw ti suspek kalpasan a naglako daytoy ti maysa nga heat-sealed transparent plastic sachet a naglaon ti maigarup a shabu iti police poseur-buyer.
Malaksid iti daytoy, nakumpiskar pay dagiti otoridad manipud iti suspek ti dua nga heat-sealed transparent plastic sachet, maysa a ribu a pisos a nausar kas buy-bust money, maysa a calibre 22 revolver, dua a bala, dua a fired cartridges ken dadduma pay a drug paraphernalia.
Mainaig iti daytoy, inpakaammo ni P/Maj. Guzman, kabayatan ti pannakaiwayat ti operasion ket naripar ti suspek a maysa a pulis ti poseur-buyer.
Gapu iti daytoy, insigida a pinaputokanna ti pulis ti namin-dua a daras ken napaspas a timmalaw usar ti motorsiklona nga agpa-daya.
Nupay kasta, simmubbot dagiti otoridad ket pinaltoganda ti suspek a nakatamaan iti akinkannawan a luppona ken akinkannigid a palay-palayna.
Kabayatanna, kuna ni Barangay Chairman Leonardo Blanco ti Barangay Upon iti ili ti Pinili a dati a natiliwen ti suspek gapu met laeng iti iligal a droga ken drug surrenderee.
Iti agdama, nagtalinaed iti Mariano Marcos Memorial Hospital and Medical Center iti siudad ti Batac ti suspek.
