LAOAG CITY – Maysa a lalaki ti inarestar ti National Investigation Agency (NIA) gapu iti car bomb attack idiay Delhi, India iti napalabas a lawas a nakatayan ti 10 nga indibidual ken nakasugatan ti 32 a dadduma pay.
Basar iti National Investigation Agency, ti lugan nga inusar iti panangatake nga ibilang ti gobierno kas “terrorist incident” ket nakarehistro iti nagan ti suspek ken mapapati a nakikunsabo iti maipagarup a suicide bomber.
Nadakamat a ti suspek ket agnanaed iti Indian-administered Kashmir.
Maipalagip a bimtak ti nasao a kotse iti asideg ti metro station iti Red Fort a maysa kadagiti nalatak a landmark iti Delhi.
Naala ti National Investigation Agency ti maysa pay a lugan a kukua ti bomber ken 73 a saksi ti na-interrogate, pakairamanan dagiti nasugatan iti insidente.
Daytoy ti kaunaan nga insidente iti siudad sipod pay idi 2011 no sadinno a napasamak ti panagpabettak iti agarup alas-6:52 ti rabii (local time) idi nagsardeng a napaut ti lugan iti traffic signal sakbay daytoy a bimtak.
Naipublikar dagiti footage a naala dagiti otoridad ti nabati a charred white car ken dadduma pay a nadadael a lugan pakairamanan ti autorickshaw ken cycle rickshaw.
Inrakurak ni Indian Prime Minister Narendra Modi a ti insidente ket maysa a “conspiracy” ken inkarina a mapagsungbat ti suspek ken dagiti kakunsabona.
Agtultuloy ti imbestigasion ti pulisia iti posible a pakainaigan ti insidente iti pannakaarestar ti pito a lallaki iti Indian-administered Kashmir ken ti pannakakumpiskar ti 2,900 kilograms ti pagpabettak iti maysa a suburb ti Delhi.
