LAOAG CITY – Naarestar manen ti suspek iti panagtatakaw iti Provincial Treasury Office babaen iti naiwayat nga Anti-Illegal Drug Buy-bust Operation iti Brgy. 8 ditoy siudad ti Laoag.
Nabigbig ti suspek a ni Jayson Corpuz, alyas puraw, agtawen iti 26, residente ti Brgy. 1 San Lorenzo ditoy siudad.
Basar iti imbestigasion, natiliw ti suspek kalpasan a naglako ti maysa nga heat sealed transparent plastic sachet a naglaon ti maatap a shabu iti maysa a pulis a nagpammarang kas poseur-buyer.
Naammoan nga agdagsen ti 6.2 grams ti nakumpiskar a maipagarup a shabu nga agbalor iti 42 a ribu a pisos.
Mainaig iti daytoy, segun ken ni Brgy. Chairman Manny Morales ti Brgy. 1, San Lorenzo ditoy siudad ti Laoag, maibilang a sakit ti ulo iti uneg ti barangayda ni Corpuz gapu kadagiti nagduduma a pakairamramananna a kaso.
Inlawlawagna a maibasar iti rekord ti suspek iti barangayda ket addan dagiti nakairamramanan daytoy gapu iti panagtatakaw.
Malaksid iti daytoy, inpalgakna a maysa pay ti suspek kadagiti agar-aramid ti iligal nga aktibidad kas ti panaglako ti droga a rason a rummuar sumrek isuna iti pagbaludan.
Gapu iti daytoy, kunana a nakikoordinar isuda iti Philippine National Police ditoy siudad ti Laoag tapno naan-anayen a masolbar ti problema iti barangayda.
Inpakaammona a nakasarsaritana mismo ti ina ti suspek no sadinno inbagana kenkuana a nasaysayaat pay nga adda lattan iti uneg ti pagbaludan ti anakna tapno agnakem kadagiti inaramidna a krimen.
Innayonna a menor de edad pay laeng ti suspek ket addan dagiti nakairamramananna a nagduduma a kaso.
Immuna iti daytoy, natiliw ti nasao a suspek iti kallabes kalpasan a nagtakaw iti Provincial Treasury Office ken napilaan ti kaso a robbery.
