LAOAG CITY – Naibaluden iti Ilocos Norte Provincial Jail ti agnagan ti Rogelio Calmang a taga Calanasan, Apayao kalpasan a napilaan ti kaso a panaglabsing ti RA 10591 gapu ti panagikot na ti iligal a paltog.
Daytoy ti inbatad ni Police Chief Insp. Roldan Suitos, hepe ti PNP Sarrat.
Kuna na a nairekomendar ti 200 a ribo a pisos para ti temporaryo a pannakawaya-waya na.
Kinumpirmara ni Suitos, a naikkat ni Calmang kas miembro ti CAFGU itay Marso 1 iti daytoy a tawen.
Inbatad na nga agdama a barangay kagawad ken agserserbi nga acting barangay chairman.
Segun kenni Suitos, agtultuloy ti panangivalidate da dagiti nagan nga adda iti listaan ti suspek a maipagarup a listaan na ti pautang.
Maipalagip a natiliw ni Calmang iti naiwayat a checkpoint itay kallabes a nakaalan da ti Kalibre 45 a paltog, dua a bala ,bala ti M14 ken tallo a dukomento a nagsuratan dagiti nagan.
