LAOAG CITY – Inbatad ni Police Major Ryan Retotar, ti chief of police iti ili ti Dingras a pilaan da ti reklamo a murder ken physical injury ti suspek iti napasamak a pammagkong iti Barangay Parado iti nasao nga ili.
Nagtalinaed met iti kustodyar ti PNP iti ili ti Dingras ti suspek a ni Ryan Aquino, agtawen ti 20, estudyante ken residente met laeng iti nadakamat a barangay.
Iti inisyal nga imbestigasyon, kabayatan a magmagna ti pimmusay a biktima a ni Ericson Agustin, agtawen ti 33 iti kalsada ket limmabas ti suspek.
Rumrumuar a dimmawat ti biktima ti sigarilyo iti suspek a nangitunda ti panaggubal da ken nagtungpal iti napasamak a pammagkong.
Naamoan a nakita daytoy ti mangngalap a ni Lester Sacramento, 36 ket ginandat na nga anawaen dagiti dua ngem maipagarop nga insublat met a binagkong ti suspek.
Segun ken ni Retotar, nagsagaba ni Agustin ti maysa a sugat iti baba ti barukong na ken dua iti bakrang na idinto a ni Sacramento ket nasugatan met ti paset ti rupa na.
Agpada a naitaray dagiti biktima iti Dingras District Hospital ngem naideklara a dead on arrival ni Agustin.
Immunan nga inbaga ti suspek iti eksklusibo nga interview ti Bombo Radyo Laoag iti suspek, inbaga na a saanna nga ingagara a bagkungen ti biktima no di ket sinalakniban na laeng ti bagina kalpasan a maipagarop a ginubal ti naud-udi.
Nupay kasta, kuna ni Retotar nga agdependen ton no ania ti aramiden a counter-affidavit ti suspek ken ti abogado na.
Kuna pay ni Retotar a daytoy pay laeng ti damo nga adda ti nakainaigan a krimen ti suspek ken basar iti panagimbestigar da ket datin nga adda ti saan a pagkinnaawatan da Agustin ken Aquino gapu ta rumrumuar a nasutil ti biktima a possible a daytoy ti pakapikpikunan ti suspek.
Mainaig iti daytoy, inpasingked ni Retotar nga itultuloy da ti agimbestigar tapno maamoan no siasinno ti naggatangan ti arak dagiti tallo gapu ta nakainom dagitoy pasado alas-otso idi rabii iti baet ti maipatpatungpal a liquor ban ken curfew iti intero a probinsya gapu iti Enhanced Community Quarantine (ECQ) a gubuay ti covid-19.
Malaksid iti daytoy, imbestigaren pay dagiti otoridad no apay a saan nga ammo dagiti opisyal ti barangay ti kaadda dagiti aggiinom iti lugar da iti dayta a gundaway.
Nagballaag ni Police Major Retotar a no maamoan da ti naglako ti arak kadagiti maseknan ken dagiti kakadwa da a naggiinom ket pilaan da ti reklamo.
Kabayatanna, inkari met ni Brgy. Chairwoman Lina Aguinaldo iti Barangay Parado iti ili ti Dingras nga agimbestigar no siasinno ti naggatangan ti arak dagiti kabarangayan na iti baet a naiget ti panagmonmonitor da kadagiti aglaklako ti arak.
Inadmitir na nga iti dayta nga oras ket awanen dagiti opisyal ti barangay iti ruwar gapu ta napan dan naginana.
Inbaga met ti kapitana a ti biktima ket naikamang idiay Tarlac ken napupuk laeng iti barangay Parado gapu iti ECQ ken naituding nga agawid koman kalpasan ti lockdown.
Innayon na nga awan met ti madi a rekord ti biktima iti barangay da.
