LAOAG CITY – Maad-adal ti pannakaipangato ti sweldo dagiti job orders ken contractual iti gobierno ditoy ciudad ti Laoag ita a tawen.
Daytoy ket kalpasan nga adda ti pammilin a maipangato ti sweldo dagiti permanente nga empleado.
Segun ken ni City Accountant Ferdinand Quiroga, pagsarsaritaan dan ti Budget Head daytoy a banag sakbay nga ilungalong da iti Sang Panlungsod ken iti opisina ni Mayor Michael Marcos-Keon.
Inbatad ni Quiroga a rebbeng na laeng a maipangato ti sweldo dagiti maseknan nga empleado kangrunaan na ket adda pay dagiti gundaway nga ag-overtime dagitoy.
Nupay kasta, saan a masinunuo ni Quiroga no mano ti pakaingatoan ti sweldo dagiti masekna nga empleado.
