LAOAG CITY – Umaboten ti nasurok a 28, 063 ti kaso ti covid-19 idiay Switzerland ken 1,187 dagiti pimmusay a kaadoan ket nataengan.
Daytoy ti report ni Shelly Ann Antonio Haefliger, frontliner gapu ta maysa a nurse iti Luzern, Switzerland.
Inbatad na a gapu iti virus ket naipatungpal ti lockdown iti nasao a pagilyan isut gapuna a napaserraan dagiti pagadalan, restaurants, ken dadduma pay a business establishments, ken arigna naka-home for work amin a tattao.
Segun kenkuana, dagiti construction workers ket mabalin da latta ti agtrabaho ngem masapol nga adda ti dua a metro ti distansya da iti tunggal maysa.
Innayon na a saan a mabalin nga ad-ado ngem lima a tattao ti rumuar iti kada maysa a balay, ken masapol nga adda ti maysa a metro a distansya.
Kabayatanna, inbatad ni Haefliger a kas paset ti lockdown ket adda latta dagiti napukawan ti trabaho ngem ti pagsayaatan na ket 80 a porsiento ti sweldo da ket ipapaay latta ti gobierno.
Mainaig iti daytoy, inpakaammo ni Haefliger nga awan ti problema iti suplay dagiti kangrunaan a magatgatang malaksid iti face mask nga adda ti panagkurkurang ti supply na.
