LAOAG CITY – Inpasigurado ni Presidente Ferdinand Marcos Jr. nga isubli ti administrasion ti kumpiansa ken talek dagiti Pilipino iti gobierno iti babaen ti responsable a panangidaulo, napintas a resulta dagiti proyekto ken serbisio publiko a napaspas ken addaan ti integridad.
Iti maikapat nga State of the Nation Address wenno SONA, inrakurak ti Presidente a no adda man ti namnamaen iti kaliplippas a May 2025 elections, daytoy ket ti kalikagum dagiti Pilipino ti napinpintas a serbisio publiko ken panangidaulo.
Inlawlawagna a nasursuronan ti resulta ti eleksion isu a nasken nga ad-adda pay a lainganna ken al-alisto a tignay.
Kunana a napaay ken nadismaya dagiti umili iti gobierno nangruna kadagiti kangrunaan a serbisio.
Gapu iti daytoy, nagpanawagan ti Presidente kadagiti opisial ti gobierno nga iyalisto ti panagtignay kadagiti arungaing dagiti Pilipino ken mangipakita ti kongkreto a resulta kadagiti ar-aramidenda.
