LAOAG CITY – Nagballigi dagiti kameng ti Philippine National Police (PNP) a nangtiliw kadagiti tallo a babbai nga illegal a nagsusugal iti mangrove area iti Barangay Ablan iti ili ti Burgos.
Daytoy ti inbatad ni Police Senior Master Sergeant Darwin Macalma, imbestigador iti PNP iti ili ti Burgos.
Segun ken ni Macalma, agarop makabolanen nga adda ti maaw-awat da nga impormasyon mainaig iti maipagarop a panagsusugal dagiti suspek iti nasao a lugar.
Inlawlawag na a saan a kanayun ti panagsusugal dagiti suspek isut gapuna a narigat da a matiyambaan dagitoy.
Nupay kasta, idi laeng malem ket adda manen ti naawat da nga impormasyon mainaig iti panagsusugal dagiti suspek isut gapuna a dagus da a nangiyuswat ti operasyon a nagresulta ti pannakatiliw da kadagiti maseknan.
Inpakaammo ni Macalma a tong-its ti manarimaan nga ay-ayamen dagiti suspek idi naaktwaran da dagitoy ken nakumpiskar da iti lugar ti 591 a pisos a maipagarop a pusta da ken ti baraha nga inusar da.
Kuna ni Macalma a basar kadagiti suspek ket pagpalpaliwaan da laeng ti agay-ayam ti baraha no malpas da a mangaldaw.
Iti agdama, nagtalinaed dagiti suspek iti kustodyar ti PNP iti ili ti Burgos.
