LAOAG CITY – Kinumpirmaran ni Police Captain Johnvale Maramag, ti chief of police ti PNP-Marcos ti pannakatiliw dagiti tallo nga indibidwal gapo iti iligal a panagsusugal da iti Barangay Lydia iti nasao nga ili.
Binigbig ni Maramag dagiti natiliw nga isuda Elmer Menor, Romulo Andres ken Onorio Andres, agpapada a residente iti nasao a barangay.
Segun kenni Maramag, ado ti reports a dumandanon kadakuada a nabayagen nga adda dagiti agsusugal iti pagtaengan ti agnagan ti Menor.
Inbatad na a ti masansan a pagay-ayaman dagiti maseknan ket iti uneg iti balay ngem gapo iti posible a kabara ti panawen ket iti kubo-kubo ti nagsusugalan da.
Gapo iti daytoy, nakita da ken ditoy a napan da a dagus tiniliw dagitoy a nagresulta pay ti panangkikinnamatan da gapo ta nagtataray dagiti suspek.
Kunana a sumagmamanon a lawas ti napalabas a mairepreport dagityo ngem narigatan da idi a mangtiliw kadagitoy gapo ta nalemmeng ti pagaya-ayaman da.
Naamoan a dagiti suspek ket nagay-ayam ti tong-its ken daytoy ti ummuna a gundaway a natiliw da gapo iti panagsusugal.
