LAOAG CITY – Kinumpirmaran ni Police Captain Eduardo Santos, chief of police ti PNP-Pagudpud ti pannakatiliw dagiti tallo a tattao gapo iti panagsusugal da iti Barangay Poblacion Dos.
Segun kenni Santos, dagit nadakamat nga indibidual ket nagay-ayam ti tong-it iti igid ti baybay iti nasao a barangay.
Ummuna iti daytoy, adda ti nagreport kadakuada a kanayon nga agsusugal dagiti maseknan.
Kunana a basar iti palawag dagiti maseknan ket nagay-ayam da bayat nga ur-urayen da dagiti agkalap.
Mainaig iti daytoy, umabot ti 225 a pisos ti nakumpiskar dagiti otoridad a pusta iti ay-ayam.
Iti agdama ket isagsaganan ti PNP-Pagudpud ti maipila a kaso kontra kadagiti nagsusugal pakairaman ti citation ticket gapo iti saan da a panagisuot ti face mask.
