LAOAG CITY – Natiliw dagiti innem nga indibidwal pakairamanan dagiti miembro ti 4Ps gapo iti panagsusugal iti paset ti Barangay Laoa iti nasao nga ili.
Nabigbig dagitoy nga isuda Cara Mangligot, 30; Jaybie Anicas, 35; Gina Galano, 34; Jacqueline Caina, 42, agpapada a residente iti Barangay 16; Judith Mingming, 32, residente iti Barangay 2 San Roque ken ni Glenn Rubio, 45 ken residente iti Barangay Quiling Sur iti ciudad ti Batac.
Segun kenni Police Lt. Rodel Baradi, chief of police ti PNP-Paoay, da Gina, Jacqueline ken Glenn ket miembro da iti 4Ps.
Inbatad na a nagsusugal dagiti suspek iti sirok ti mangga ken idi napan dagiti otoridad ket nakataray dagiti dua kadagitoy ngem dagus met laeng a nagammatan dagiti pulis.
Nakumpiskar dagiti otoridad ti 1 a set ti baraha, 3,806 a pisos, maysa a plastic container, maysa a galloon, ken tarpaulin nga isu nagsusugalan da.
Inbatad ni Baradi a basar iti impormasyon da ket kanayon nga umakar dagiti suspek ti lugar a pagsusugalan ken no dadduma ket iti kataltalonan ngem idi awanen dagiti mula a mais ket napan da iti sirok ti mangga.
Nupay kasta, kuna ni Baradi a kanayun da nga imonmonitor dagiti suspek rason a nagballigi ti inyuswat da nga operasyon.
