LAOAG CITY – Kinumpirmaran ni Barangay Chairman Noel Quemado iti Barangay Nalasin iti ili ti Paoay nga adda ti tallo a pamilya a nagkedked a dumalan iti swab test.
Segun kenni Quemado, ti duman-danon kenkuana a rason ket maipagarop a mabuteng dagiti maseknan a pamilya a dumalan iti swab test gapo ta nasakit.
Inpasigurado met ti kapitan a saan a nasakit ti swab test gapo ta dimmalan met isuna.
Kunana a ti panagkedked dagiti tallo a pamilya a dumalan iti swab test ket isu met ti maipagarop a pagamkan dagiti dadduma a residente.
Gapo iti daytoy, inreport da daytoy a banag iti RHU ken babaen iti pannakisarita dagiti maseknan ket manamnama a dumalan met laeng dagiti tallo a pamilya iti RT-PCR test.
Innayon na a maysa kadagiti inpalawag da kadagiti maseknan a pamilya ket saan a mailift ti pannakailockdown ti Sitio no saan a dumalan dagitoy iti swab test.
Kabayatanna, inpetteng manen ni Quemado a saan da a napastrek iti Nalasin Elementary School iti laksid ti rakurak ti DepEd a nakalinong met laeng dagiti nag-swab test.
Inbatad na nga adda ti panagsakit ti rikna na gapo ta dagiti doktor, nurses ken dadduma pay a timmulong a nag-swab test ket nagbasa-basa gapo iti tudo.
Innayon na a ti tinawagwan na ket ti maysa a mangisursuro iti nasao a pagadalan ken daytoy ti nangibaga iti principal ngem maipagarop a saan latta a naipalubos a sumrek da uray iti laeng covered court.
