LAOAG CITY – Naipakustudiyar iti PNP dagiti tallo a pares wenno innem nga indibidual gapo iti saan da a panagbayad iti rinentaan da kwarto iti transient home iti Barangay Saud iti ili ti Pagudpud.
Segun kenni Police Senior Master Sergeant Mark Domingo, imbestigador iti PNP-Badoc, dagiti nasao nga indibidual ket agtawen ti 20 agpababa.
Inbatad na a nagrenta ti saggagaysa a kwarto iti transient house dagiti tallo a pares ken nagtalinaed da iti nasao a lugar ti dua a lawas para iti honeymoon da.
Nupay kasta, idi agsingir ti agpapaupa iti kwarto iti sag-15 a ribo a pisos ti tunggal kwarto ket inbaga dagiti maseknan nga awan ti pagbayad da.
Kunana a kalpasan ti panagsasarita da ket nagkari dagiti innem nga indibidual a bayadan da ti inupaan da a kwarto.
Naamoan a dagiti innem nga indibidual ket residente iti ciudad ti Batac, Dingras, Marcos, Banna ken Nueva Era.
