LAOAG CITY – Nangipila ni Senate Committee on Basic Education Chairman Senador Sherwin Gatchalian ti gakat tapno kissayan ti maysa a tawen iti panagadal dagiti estudiante iti kolehio.
Manipud iti uppat a tawen, kalikagum ni Gatchalian nga aramiden laengen daytoy ti tallo a tawen.
Inlawlawag ti Senador, apaman a tumapog ti estudiante iti kolehio ket major subject nga insigida ti adalen daytoy idinto a maikabil met iti Senior High School dagiti general subjects.
Kunana a ti nasao a sistema ket maipatpatungpalen kadagiti nagduduma a pagilian kas ti United Kingdom, Canada ken Australia.
Gagem ti pannakakissay ti tawen iti kolehio ket tapno maliklikan ti pannakaulit kadagiiti courses ken makapokus dagiti agad-adal iti specialization dagitoy.
Innayonna a nasken nga ipangpangruna ti panangisuro kadagiti soft skills kadagiti estudiante iti Senior High School pakairamanan ti critical thinking, communication, problem solving, socio-emotional skills, creativity ken collaboration.
