LAOAG CITY – Kinumpirmaran ni Ms. Rowena Nicolas, Nurse II ken In-charge ti Vaccination Program ti City Health Office ti Laoag nga umaboten ti 801 ti bilang dagiti naimaldit da a nakagat iti aso manipud bulan iti Enero agingga iti Mayo iti daytoy a tawen.
Nupay kasta, kadagupan ti nasao a bilang ti dog bites ket awan pay ti nagpositibo ti rabies iti laksid nga adda tallo nga aso ditoy ciudad ti Laoag a nagpositibo kalpasan a naipadalanda ti laboratory examination.
Inpakaammo ni Nicolas a dagiti positibo ti rabies ket manipod iti Brgy. 11, Brgy. 19 ken Brgy. 54-A dtoy ciudad.
Kabayatanna, inbatad na a ti kaubinggan a biktima ti kagat ti aso ket innem a bulan a maladaga idinto a ti kataengan ket agtawen ti 91.
Kuna ni Ms. Nicolas nga amin a nakagat iti aso a naimaldit da ket natudokan da ti bakuna kontra rabies.
Daytoy ket naipaay a libre kadagiti biktima gapu ta adu ti supply ti City Health Office manipud ti Dept. of Health ken dagiti dadduma ket ginatang ti City Government.
