LAOAG CITY – Naarestar dagiti tallo nga indibidual kalpasan a nangiwayat dagitoy ti drag racing iti ili ti Dingras.
Ti dua a motorista ket agtawen ti 37 ken 31 nga agpada a contruction worker ken residente ti Barangay Albano, iti isu met laeng nga ili.
Ti met maysaa ket gtawen ti 23, awanan asawa, ken residente ti Barangay 5-B Pagsanaan Norte iti ili ti Badoc.
Inbatad ni P/Maj. Adrian Agbannaoag, ti pannakangiwat ti Ilocos Norte Police Provincial Office (INPPO) nga naipadanon kadakuada iti report mainaig iti drag racing iti bypass road a paset ti Barangay Guererro iti ili ti Dingras no sadinno nga insigida met ti panagresponde dagiti otoridad.
Inpakaammo ni Agbannaoag a dagitoy ket insigida a naipaayan ti citation tickets no sadinno a ginandat pay ti 2 a motorista ti aglibas.
Apaman a maarestar dagitoy ket natinnagda ti bassit a weighing scale ken maysa a papel a naglaon ti one heat-sealed transparent sachet a mapatta-patta a shabu.
Insigida met a nangiwayat ti body search dagiti otoridad ket ditoy a nakumpiskar ti maysa pay a heat-sealed transparent sachet a mapatta-patta met laeng a shabu ken nagduduma pay a drug paraphernalia.
Gapu iti daytoy, malaksid iti citation ticket ket sumango dagiti tallo nga indibidual ti panaglabsing ti Republic Act No. 9165 wenno Comprehensive Dangerious Drugs Act of 200 a maipila kontra kadagiti suspek.
