LAOAG CITY – Nabagkong ti tallo nga indibidual iti uneg mismo ti pagtaenganda iti Barangay Barit ditoy siudad ti Laoag.
Basar iti inisyal nga imbestigasion dagiti otoridad, dagiti maseknan a biktima ket maysa a babai, lalaki ken ubing.
Mainaig iti daytoy, inbatad ni Barangay Chairman Benjamin Pudiquet iti nasao a barangay nga adda ti naawatda a tawag nga adda ti napasamak a pammagkong iti barangayda.
Gapu iti daytoy, insigida a napan nagresponde dagiti opisial ti barangay kageddan ti panangipakaammoda iti Philippine National Police.
Kuna ti Kapitan ket naisyuan ti Barangay Protection Order ti suspek idi Disiembre.
Naammoan nga adda ti dua nga heat sealed transparent plastic sachet a naglaon ti maigarup nga iligal a droga ti nakita dagiti otoridad iti motorsiklo ti suspek.
Kabayatanna, rumrummuar a love triangle ti makitkita a rason iti napasamak nga insidente ngem agtultuloy pay laeng ti maiwaywayat a naun-uneg nga imbestigasion seknan iti daytoy.
