LAOAG CITY – Saan laeng a 10 no di ket 14 a kanta ni Taylor Swift ti simrek iti Top 14 songs ti Billboard Hot 100.
Gapu iti daytoy, binurak ni Taylor ti bukudna a rekord idi 2022 idi magun-odna ti Top 10 ti nasao a music record chart.
Daytoy ket kalpasan nga amin a kanta iti Top 14 ket naggapu iti kairuruar laeng nga album ti international pop star a The Tortured Poets Department.
Indauloan daytoy ti lead single-na a Fortnight a nakaala ti 76 million streams ken 19 thousand a traditional sales. Daytoy met ti maika-12 a kanta ni Taylor Swift a nag-number 1 iti Billboard Hot 100.
Ti nadakamat nga album-na ket nakailakon ti 2.6 million units. Gapu iti daytoy, daytoyen ti maikadua nga album nga addaan ti kadakkelan a debut record iti pakasaritaan kagiddan ti album ni Adele idi 2015 a nakairekord ti 3 million unit sales.
Iti maysa nga online post, nagyaman ni Taylor kadagiti amin a dimngeg ken gimmatang kadagiti kantana.
