LAOAG CITY – Kalikagum ti Technical Education and Skills Development Authority – Ilocos Norte a maipababa ti job mismatch.
Segun ken ni Dr. Socorro Galanto, Provincial Director ti Technical Education and Skills Development Authority ditoy probinsia, babaen kadagiti isaysayangkatda a nagduduma a programa ket matulungan dagiti umili nangruna kadagiti agbirbiruk ti trabahona a dumalan iti panagsanay.
Inbatadna a dakkel a tulong kadagiti agbirbiruk ti trabahona dagiti maisaysayangkat a training ken seminar tapno ditoy a maisuro kadakuada ti rumbengda nga aramiden apaman a nakastrekda iti pagtrabahoan.
Inlawlawagna nga iti panagbinnulig dagiti Technical Vocational Institutions ken ti Technical Education and Skills Development Authority ket maarisit ti kasapulan nga skills wenno abilidad ti maysa nga indibidual nga ad-adda a maasa ti kapabilidad dagitoy iti trabaho.
Kunana a babaen ti Area Based Demand Driven ket ditoy a makita dagiti provincial skills priorities nga adda kadagiti umili a mabalin nga ipaay kadagiti nagduduma nga industria nga adda ditoy probinsia.
