LAOAG CITY – Nairekord ti Thailand ti kaunaan a pannakatay manipod iti anthrax kalpasan a kinumpirmaran dagiti opisyal ti dua a kaso ti impeksyon ken ginasut a possible a na-expose iti bacteria.
Segun kadagiti opisyal, mapatta-patta nga umabot iti 638 tattao ti possible a na-expose, kaadoan ket dagiti nangan ti kilawen wenno nakurang ti pannakaluto na a karne ti baka.
Manipod iti nasao a bilang ket 36 ti timmulong a nagparti ti ayop idinto a naikkan da met aminen ti antibiotics kas paset ti containment measures.
Mainaig iti daytoy, indeklarar ti Department of Livestock ti 5-kilometer quarantine zone iti lawlaw ti lugar ken plano a bakunaan ti 1,222 a baka, nupay awan pay dagiti ayop a nangipakita ti sintomas wenno saan a mailawlawag a pannakatay.
Ti anthrax ket maysa a rare ngem seryoso a bacterial disease a masansan a maala iti babaen ti panag-kontak iti ayop wenno pannangan ti kontaminado a karne ngem saan a maipasa manipod tao iti tao.
Naudi a naaddaan ti kaso nga anthrax ti Thailand idi 2017, ngem awan ti pimmusay.
