LAOAG CITY – Inparaman ti Oklahoma City Thunder ti 43 points a pannakaabak iti Denver Nuggets ken naitabla ti serye iti 1-1.
Arig bimmales ti Thunder kalpasan a napabainan daytoy iti bukud nga homecourt iti Game 1 ken ad-adda a limmamang ti maikadua a laban kontra iti 2023 NBA champion.
Iti panaglippas pay laeng ti umuna a kuarter, iggemen ti Thunder ti 31 points a lamang, iti iskor nga 87 – 56.
Nakaaramid ti Thunder ti NBA Playoff record ti 87 points a naiserrekna kas kangatoan a team score iti single half.
Sinaruno pay daytoy ti Thunder iti 3rd quarter ken tinambakan ti Nuggets ti 48 points iti panagngudo ti nasao a kuarter iti iskor a 124-76.
Saanen a pinagay-ayam pay dagiti starter ti Thunder iti maudi a paset ti laban ken agpapada dagiti bench player laeng ti naiserrek tapno lippasen ti maikadua a game.
Indauloan ti panagballigi ti Thunder ti guard a ni Shai Gilgeous-Alexander a kimmamada ti 34 points ken walo a rebounds. Walo a player met ti koponan ti nangaramid ti double-digit score iti pakabuklan ti laban.
Iti pannakaabak ti Nuggets, ti laeng 17 points, walo a rebounds ken innem nga assists ti naaramid ti 3-time NBA MVP a ni Nikola Jokic idinto a 14 points ti nagbalin a kontribusion ti guard a ni Jamal Murray.
Inpilit pay ti dua a Denver star a sumubbot iti 2nd half ti laban ngem saanen nga inpabus-oy ti Thunder.
Kabayatanna, maisayangkat iti homecourt ti Nuggets ti Game 3 ken Game 4 idinto nga agsubli iti homecourt ti Thunder ti Game 5.
