LAOAG CITY – Naiwayat ti tignay protesta mainaig iti pannakausar dagiti hotel para kadagiti agsapsapul ti housing asylum idiay United Kingdom.
Naguummong dagiti demonstrador iti nagduduma a paset ti England kas ti Bristol, Liverpool ken London pakairamanan ti Mold idiay Wales, Perth idiay Scotland ken County Antrim idiay Northern Ireland.
Naiget a nagbantay dagiti pulis tapno maipasigurado nga awan ti dakes a mapasamak kabayatan ti panangiwayatda ti tignay protesta dagiti grupo kontra iti rasismo ken demostrasion.
Namunganay daytoy kalpasan a nangiyetnag ti nangato a korte ti desision iti pannakaipawil ti hotel iti Epping ken Essex a mangakomodar kadagiti agsapsapul ti housing asylum.
Kabayatanna, naruay a tattao ti nakipagpaset iti tignay protesta no sadinno nga adda ti iggem dagitoy a banner nga adda ti nakasurat a kalikagumda a mapatalaw dagiti indibidual a nagturong kadagiti hotel para iti housing asylum, naiget a panangkontrada iti rasismo ken dadduma pay.
