LAOAG CITY – Kalikagum ni Gilas Pilipinas head coach Tim Cone nga agbalin a napigsa ken awan ti injury dagiti umaayamna iti panagsabak iti FIBA Asia Cup Qualifiers a maisayangkat inton Pebrero 20 ken 23 idiay Taiwan ken New Zealand.
Inbatad ni Cone a no mabalbalin ket agbalin laeng a nalag-an ti panagsanayda tapno saan nga agsagaba ti injury dagiti umaayam.
Makipaset ti Gilas Pilipinas iti 2nd International Friendly Basketball Championship inton Pebrero 14 idiay Doha, Qatar.
Makasangoda ti Qatar, Egypt ken Lebanon iti nasao a laban.
Naammoan a sumagmamano kadagiti umaayam a nasken a saan unay a mabannog ket da naturalized player Justin Brownlee ken AJ Edu a naggapu met iti injury.
Ibilang ni Cone a ti nasao a friendly game idiay Qatar ket paset ti panagsagsaganada iti FIBA Asia Cup Qualifiers a ti umuna a makalabanda ket ti Taiwan inton Pebrero 20 ken New Zealand met inton Pebrero 23.
Kabayatanna, adda ti nadalos a rekord nga uppat a panangabak ken awan pay ti abak ti Gilas Pilipinas iti FIBA Asia Cup Qualifiers.
