LAOAG CITY – Balligi a naarestar ti provincial Top 1 most wanted person iti Brgy. 5 San Vicente iti ili ti Sarrat gapu iti kaso na a rape.
Binigbig ni Police Chief Master Sergeant Elmer Bactin iti Philipine National Police-Sarrat ti naarestar a suspek nga agtawen ti 22 ken residente iti nasao a barangay.
Kuna na a namunganay ti pannakaipila ti kaso kontra iti suspek kalpasan a nagreklamo idi Oktubre itay napan a tawen ti biktima na nga agtawen ti 13 ken agnanaed ditoy siudad ti Laoag.
Inbatad na a basar iti palawag ti biktima ket Setiembre itay napan a tawen a napasamak ti panagrames ken napasamak iti uneg ti pagtaengan ti suspek.
Gapu iti daytoy, kuna ni Bactin a dagus a naipila ti kaso kontra iti suspek ken naiparuk-at ti warrant of arrest idi Enero ita a tawen.
Immunan nga inpakaammo ni Bactin a ti suspek ket addan maysa a bulan nga agar-arem iti biktima idi napasamak ti panagrames.
Naipisok ti suspek iti Ilocos Norte Provincial Jail kalpasan nga awan ti nairekomendar a piyansa para iti temporaryo a pannakawaya-waya na.
