LAOAG CITY – Nagballigi dagiti otoridad a nangarestar iti maysa a lalaki babaen iti naisayangkat a search operation gapu iti panaglabsing ti Republic Act 9165 wenno Comprehensive Dangerous Drugs Act of 2002 ken ti Republic Act 9516 wenno iti Comprehensive Firearms and Ammunition Regulation Act iti Barangay 17-A, Parang iti ili ti Badoc.
Ti Search Warrant ket inparuk-at ni Presiding Judge Regional Trial Court, Branch 18, Batac City kontra iti suspek a maibilang kas Top 10 Regional High value individual ti Police Regional Office I.
Immuna iti daytoy, napakadaan ti suspek ti isasangpet dagiti otoridad isut gapuna a nagtalapwagaw a dagus no sadinno a kimmamang iti kabanbantayan iti lauden ti balayda.
Iti panangkamat dagiti otoridad iti suspek ket nakita da daytoy a nakalubban kadagiti mula a nateng iti rangkis a paset ti bantay ken maipagarop a napukawan pay ti poot.
Gapu iti daytoy, dagus nga inayaban dagiti otoridad dagiti paramedics manipod iti Rural Health Unit ti ili ti Badoc tapno maitaray ti suspek iti Corpuz Clinic and Hospital iti Sinait, Ilocos Sur.
Iti baet ti napasamak iti suspek ket intuloy latta dagiti otoridad ti nagsukimat iti balayda babaen ti panangimatang ti ina na ken dagiti barangay officials.
Nakakumpiskar dagiti otoridad ti lima a medium heat-sealed transparent plastic sachets a naglaon ti maipagarop a shabu, pito a babassit nga heat-sealed transparent plastic sachets a naglaon metlaeng ti maatap a shabu, maysa nga open transparent plastic sachet nga addaan ti white residue, maysa nga MK2 fragmentation hand grenade, maysa a bala para iti caliber 9mm, ken drug paraphernalia.
Kalpasan ti pannakataming ti suspek iti ospital ket insubli da metlaeng iti balayda ken naimatangan na ti panagimbentaryo dagiti otoridad kadagiti ebidensya kontra kenkuana.
Iti agdama nagtalinaed ti suspek iti Phillipine National Police iti ili ti Badoc kabayatan a maisagsagana dagiti kaso a maipila kontra kenkuana.
