LAOAG CITY – Balligi a naarestar dagiti otoridad ti Top 4 Most Wanted Person ditoy rehion 1 idiay Oriental Mindoro babaen iti warrant of arrest nga inserbi ti Philippine National Police iti ili ti Pasuquin, nga indauloan ni P/Maj Johnvale Maramag.
Nabigbig ti suspek a ni Jericho Rioflorido, agtawen ti 31, awanan trabaho, residente iti Brgy. 33 iti ili ti Pasuquin ken agtutubo iti Brgy. Tabon Tabon Baco Oriental Mindoro.
Sumangsango ti suspek iti kaso a statutory rape ng addaan ti 10 counts ken awan ti naipaay a pagpiansa na.
Malaksid iti daytoy, adda pay sangsanguen ti suspek a kaso a gapu iti panaglabsingna iti Acts of Lasciviousness no sadinno narekomendaran daytoy iti pagpyansa a P180,000.00.
Mainayon pay iti daytoy, adda pay ti sangsangoenna a kaso gapu iti panaglabsingna iti Sexual Abuse nga addaan ti 15 counts ken narekomendaran daytoy iti pagpyansa a P200,000 iti tunggal counts.
Sumangsango pay ti suspek iti kaso a Lascivious Conduct ken narekomendaran daytoy iti pagpyansa nga P200,000.00.
Ti nasao a warrant of arrest ket inparuk-at ni Hon. Charles Javier Magpale Calapini Presiding Judge ti Regional Trial Court Branch 19 iti ili ti Bangui.
Naammoan nga ti suspek ket naireklamo daytoy gapu iti maipagarup a panagrames iti maysa a menor-de-edad iti ili ti Pasuquin.
Kabayatanna, nagtalinaed ti suspek iti kuerpo ti Philippine National Police iti ili ti Pasuquin ken manamnama a maidatag iti korte a naggapuan ti warrant of arrest.
